1. in finem puero Domini David quæ locutus est Domino verba cantici hujus in die qua eripuit eum Dominus de manu omnium inimicorum ejus et de manu Saul et dixit

2. diligam te Domine fortitudo mea

3. Dominus firmamentum meum et refugium meum et liberator meus Deus meus adiutor meus et sperabo in eum protector meus et cornu salutis meæ et susceptor meus

4. laudans invocabo Dominum et ab inimicis meis salvus ero

5. circumdederunt me dolores mortis et torrentes iniquitatis conturbaverunt me

6. dolores inferni circumdederunt me præoccupaverunt me laquei mortis

7. cum tribularer invocavi Dominum et ad Deum meum clamavi exaudivit de templo sancto suo vocem meam et clamor meus in conspectu ejus introibit in aures ejus

8. et commota est et contremuit terra et fundamenta montium conturbata sunt et commota sunt quoniam iratus est eis

9. ascendit fumus in ira ejus et ignis a facie ejus exarsit carbones succensi sunt ab eo

10. inclinavit cælos et descendit et caligo sub pedibus ejus

11. et ascendit super cherubin et volavit volavit super pinnas ventorum

12. et posuit tenebras latibulum suum in circuitu ejus tabernaculum ejus tenebrosa aqua in nubibus æris

13. præ fulgore in conspectu ejus nubes ejus transierunt grando et carbones ignis

14. et intonuit de cælo Dominus et Altissimus dedit vocem suam grando et carbones ignis

15. et misit sagittas et dissipavit eos et fulgora multiplicavit et conturbavit eos

16. et apparuerunt fontes aquarum et revelata sunt fundamenta orbis terrarum ab increpatione tua Domine ab inspiratione spiritus iræ tuæ

17. misit de summo et accepit me adsumpsit me de aquis multis

18. eripiet me de inimicis meis fortissimis et ab his qui oderunt me quoniam confirmati sunt super me

19. prævenerunt me in die adflictionis meæ et factus est Dominus protector meus

20. et eduxit me in latitudinem salvum me faciet quoniam voluit me

21. et retribuet mihi Dominus secundum justitiam meam et secundum puritatem manuum mearum retribuet mihi

22. quia custodivi vias Domini nec impie gessi a Deo meo

23. quoniam omnia judicia ejus in conspectu meo sunt et justitias ejus non reppuli a me

24. et ero inmaculatus cum eo et observabo ab iniquitate mea

25. et retribuet mihi Dominus secundum justitiam meam et secundum puritatem manuum mearum in conspectu oculorum ejus

26. cum sancto sanctus eris et cum viro innocente innocens eris

27. et cum electo electus eris et cum perverso perverteris

28. quoniam tu populum humilem salvum facies et oculos superborum humiliabis

29. quoniam tu inluminas lucernam meam Domine Deus meus inluminas tenebras meas

30. quoniam in te eripiar a temptatione et in Deo meo transgrediar murum

31. Deus meus inpolluta via ejus eloquia Domini igne examinata protector est omnium sperantium in eum

32. quoniam quis deus præter Dominum et quis deus præter Deum nostrum

33. Deus qui præcingit me virtute et posuit inmaculatam viam meam

34. qui perfecit pedes meos tamquam cervorum et super excelsa statuens me

35. qui doces manus meas in prœlium et posuisti arcum æreum brachia mea

36. et dedisti mihi protectionem salutis tuæ et dextera tua suscepit me et disciplina tua correxit me in finem et disciplina tua ipsa me docebit

37. dilatasti gressus meos subtus me et non sunt infirmata vestigia mea

38. persequar inimicos meos et conprehendam illos et non convertar donec deficiant

39. confringam illos nec poterunt stare cadent subtus pedes meos

40. et præcinxisti me virtute ad bellum subplantasti insurgentes in me subtus me

41. et inimicos meos dedisti mihi dorsum et odientes me disperdisti

42. clamaverunt nec erat qui salvos faceret ad Dominum nec exaudivit eos

43. et comminuam illos ut pulverem ante faciem venti ut lutum platearum delebo eos

44. eripe me de contradictionibus populi constitues me in caput gentium

45. populus quem non cognovi servivit mihi in auditu auris obœdivit mihi

46. filii alieni mentiti sunt mihi filii alieni inveterati sunt et claudicaverunt a semitis suis

47. vivit Dominus et benedictus Deus meus et exaltetur Deus salutis meæ

48. Deus qui dat vindictas mihi et subdidit populos sub me liberator meus de gentibus iracundis

49. et ab insurgentibus in me exaltabis me a viro iniquo eripies me

50. propterea confitebor tibi in nationibus Domine et psalmum dicam nomini tuo

51. magnificans salutes regis ejus et faciens misericordiam christo suo David et semini ejus usque in sæculum





“Temos muita facilidade para pedir, mas não para agradecer”. São Padre Pio de Pietrelcina